Sönghelgi í sumarbyrjun

Það er sannkölluð sönghelgi framundan hjá Karlakór Akureyrar-Geysi, þar sem sungið verður á þremur stöðum á jafn mörgum dögum. Sjálfir Vortónleikarnir 5. maí verða þar auðvitað hápunkturinn!

Föstudaginn 4. maí kl. 18:30 syngur KAG í hjúkrunar- og dvalarheimilinu Hlíð á Akureyri. Smá forskot á sæluna þar sem sungin verða nokkur lög af dagskrá Vortónleikanna. Annars er Hlíð reglulegur viðkomustaður KAG, en kórinn syngur þar af og til á hverju starfsári og fær alltaf jafn góðar móttökur!

Vortónleikar KAG eru jafnan hápunktur starfársins. Þeir verða í Glerárkirkju, laugardaginn 5. maí og hefjast kl. 15:00. Þar verða sungin lög úr öllum áttum, hefðbundin íslensk karlakóralög og erlend lög í bland. Fjórir einsöngvarar koma fram á tónleikunum auk þess sem KAG-kvartettinn tekur lagið.

Sunnudaginn 6. maí kl. 15:00 sameinast svo Karlakór Akureyrar-Geysir, Kvennakór Akureyrar og Karlakór Siglufjarðar á tónleikum í Siglufjarðarkirkju. Félagar í KAG vita af eigin reynslu að Siglfirðingar eru skemmtilegir heim að sækja, auk þess sem nú tekur ekki nema rétt um klukkutíma að keyra til þeirra í heimsókn!