Fréttir

Laugardaginn 1. nóvember verður haldið Heklu-mót á Húsavík. Hekla, samband norðlenskra karlakóra stendur fyrir þessu móti fjórða hvert ár og er þetta hið sautjánda í röðinni. Þessi mót eru algjör veisla fyrir áhugafólk um kórsöng. Hver kór fyrir sig syngur þrjú lög og síðan syngja allir kórarnir saman fimm lög.

Þessa dagana æfir KAG fyrir söngmót Heklu, Sambands norðlenskra karlakóra, sem haldið verður á Húsavík 1. nóvember næstkomandi. Þangað hafa tíu kórar boðað komu sína, en reikna má með að 350 karlar hefji þar upp raust sína.

Karlakórinn Þrestir er þessa dagana á söngferð um landið og tónleikar í höfuðstað Norðurlands eru að sjálfsögðu á dagskrá! Þrestirnir syngja í Glerákirkju á sunnudaginn, 28. sept. og hefjast tónleikarnir klukkan 16:00. Karkakór Akureyrar-Geysir ætlar að syngja fyrir félaga sína Þrestina og hefja tónleikana með nokkrum lögum!

Það var vel mætt á fyrstu æfingu haustsins í kvöld. Ríflega 40 kallar mættu í Lón og nokkur ný andlit í hópnum! Þetta lofar góðu fyrir veturinn, sem verður vonandi viðburðaríkur og skemmtilegur. Fyrsta stóra verkefni vetrarsins verður Heklumót, norðlenskra karlakóra, sem haldið verður á Húsavík í nóvember.       

Eins og mörg undanfarin ár, tók KAG lagið fyrir gesti Sjómannadagsins á Akureyri. Fjöldi gesta hlýddi á kórinn taka lagið á Torfunefsbryggju, þar sem fram fór skemmtun í tilefni dagsins. KAG var þarna í góðum félagsskap, en meðal þeirra sem tóku lagið voru Yfirliðsbræðurnir Örn og Óskar og Þorvaldur Halldórsson og Helena Eyjólfsdóttir.

Snorri Guðvarðsson, formaðurinn okkar, var kjörinn formaður Sambands íslenskra karlakóra (SÍK) á aðalfundi sambandsins 17. maí sl. Við óskum Snorra innilega til hamingju með embættið og heitum þess að sjálfsögðu að styðja hann með ráðum og dáð!   

Árlegir vortónleikar Karlakórs Akureyrar-Geysis verða í Glerárkirkju, laugardaginn 17. maí. Daginn áður fer kórinn til Siglufjarðar og syngur í Bíósalnum þar. Að vortónleikum loknum er eiginlegu vetarstarfi KAG lokið þetta árið og því gerum við okkur dagamun með mikilli veislu í Lóni á laugardagskvöld.

Á uppstigningardag, söng KAG við messu í Glerárkirkju, en þetta er orðið að árlegum viðburði í starfi kórsins. Þetta skemmtilega samstarf hefur skapast í kjölfar þess að KAG syngur jafnan eina tónleika í kirkjunni á hverju vori. Því má segja að við séum að borga húsaleiguna með því að leggja kirkjunni lið í messu á uppstigingardag! 

Þann 5. apríl hélt KAG kóramót, sem við köllum “Hæ, Tröllum á meðan við tórum”. Þetta mót er orðið að árlegum viðburði, en þarna hittast nokkrir kórar og syngja saman.

Félagar í Karlakór Akureyrar-Geysi urðu fyrstir til að syngja í Hofi, nýju menningarhúsi á Akureyri. Sungið var í beinni útsendingu Kastljóss Sjónvarpsins, en dagskrárgerðarfólk RUVAK brá á það ráð að kanna hljómburðinn í hálfbyggðu húsinu.